ـ1ـ
بهالجايزه يا شربل لـ بيفوز
بتنزل ع إسمو من المجد هاله
متل اللي فجأه بيحصل عْلى كنوز
وبيصير قادر يقطف الغالي
وبيصير إسمو بالشعر مبروز
لكن إذا ما بيحمل رساله
وما بيقدر محبة الناس يحوز
مهما ع إسمو نشقع نياشين
بيضل إسمو مكسّر وبالي
ـ2ـ
يعني القصيده بدها أخلاق
تا تقدر تدفّي قوافيها
ويكون شاعر بالحكي ذوّاق
بيعرف الكلمه كيف يحكيها
شاعر بيحكي شعر للعشاق
وبينمّق الكلمه ومعانيها
ومن ميل تاني بعالم الأشواق
بيغدر مرا بأسمى أمانيها
وبيشوف حالو بالشعر عملاق
بس البشر بتشوف إنّو زغير
حتى اللي حبّا فيه يئذيها
ـ3ـ
وإنت شاعر للبشر معروف
بكلمة الحرّه.. والنفس حرّه
مهما عليك تبدلت الظروف
الشاعر الـ جوّا بينضح لبرا
قلبك على وهج الحرف ملهوف
حتى القصيده تضل مخضرّه
ومطرح ما شك البعض فيك سيوف
ضمّدت جرحك بالوفا ومشيت
وصار الشعر ع الجرح يتمرّى
ـ4ـ
يا شاعر لـ من أول الأيام
عالي وبعدك عم بتتعلّى
متل المرا الـ بتكون من أحلام
بكبر العمر بتضل تتحلّى
يا شاعر اللي بكلمتك رسّام
سلاسل دهب منها بتتدلّى
كنت انت وبعدك لقدّام
وكل اللي منّك بالشعر بيغار
ضلّك ع حكيو ضحاك وتسلّى
**
0 comments:
إرسال تعليق