خطوبة حسن صباغ والفت علي كرنيب

الحب جمعهما، والشيخ كامل وهبه بارك خطوبتهما في أول نيسان من عام 2016، وسط زغاريد وفرحة المئات من الأهل والأصحاب. فالعروس ألفت هي ابنة رئيس مجلس الجالية اللبنانية، وعضو بلدية ليفربول الصديق علي كرنيب، والعريس هو حسن صباغ، الذي حضرت أمه "أم حسين" وأخوه حسين من لبنان، خصيصاً لحضور الفرحة. ونظراً لمكانة العريس ووالد العروس في قلب شربل بعيني، أهدى العروسين هذه القصيدة:

ـ1ـ

أُلفت علي كرنيب حبّت شبّ

ساكن بصدري سْنين.. جُوّا القلب

إسمو حسن صبّاغ شَيْخ شْبابْ

راضي الأهل.. وعليه راضي الربّ

بـ "الأنتْرِس" عشنا سوا أصحاب

وبعدا الصحبه ماشيه ع الدرب

طاهر، أمين الكفّ، مش كذّابْ

شاطر.. ذكي.. إنسان.. وبينحبّ

ـ2ـ

وبَيّك يا أُلفتْ زيّن الغربه

إسمو علي كرنيب بيكفّي

صاحب وفي عم يسكن بقلبي

ووين ما سكن بيرجّح الكفّه

بْعرس بِنْتو طلبت من ربي

يْعَبّي حَياتا حُبّ للشِّفّه

ومع حسن صبّاغ بمحبّه

ترسم طريقا.. بزهرة العفّه

واليوم لمّا بتنتهي الخطبِه

بتحضن مارون الراس بنت جبيل

وبأرض سيدني بْتعْمَر الزفّه

ـ3ـ

"الحسّون" عم يفرح بطلّة أم

زلاغيطها رقصت ع أشرف تمّ

جايي وبقلبا حامله الأوطان

ودمعة شعب كل يوم عم ينسمّ

جايي تهنّي بضحكتا العرسان

بإسم الأمومه تشيل عنّن همّ

حملت معا ترابات من لبنان

وقالت: يا أُلفت.. علّمي الأطفال

تراب الجنوب بْيِنْفَدى بالدمّ

ـ4ـ

حِبّ أُلْفَتْ.. غَنّجا عَ طولْ

أَحْلَى عروسْ مْسَوسَحَه الِعقُولْ

بالعلم.. بالاخلاق.. بالايمان

وإسمَك حَسَن.. هالإسم مُشْ معقول

افتكروا العرس كذبة شهر نيسان

تاري حقيقه.. صعب إنّو تزولْ

ربّوا بْتَقْوى بْناتْ مَعْ صِبْيانْ

يوزّعوا الرحمه بِـ هالأكوانْ

ساعتا مِنْقُول: دقّي يا طْبُولْ

**